Moman detant i termin an trazedi

En moman detant par en group zenn kominote Baha'i ti termin an trazedi Dimans 31 Out ler de parmi zot ti noye Roche Copra, Baie Lazare.

Dapre en kominike lapolis, ti ver 3.30 apremidi ki Anisha Pillay aze 17 an ki reste Anse Aux Pins, akonpannyen par 2 lezot son zanmi fiy ti al naze.

Pandan ki zot ti dan delo sale kouran ti trenn Anisha ek en lot son zanmi deor tandis ki sa lot fiy ti ganny sans retourn ater pour vin rod lasistans.

La, Shrogie Docteur, aze 19 an, ek 2 lezot koleg, ti sorti pour al esey sov sa 2 fiy me kouran ti trenn Shrogie.

Malgre ki sa 2 koleg ti eseye pour sov Shrogie zot pa ti kapab alor zot osi zot ti forse retourn ater pour lasistans.

Sete Life Guard ki ti pli tar asiste pour ranmas Anisha ek son dalon Raijana Prosper ki en zabitan Anse Royale e ki aze 18 an.

Letan ki sa 2 fiy ti ganny ranmase, Raijana ti paret byen me Anisha ti san konesans. Deswit Anisha ti ganny transporte lopital Anse Royale kot i ti ganny egzaminen, epi ganny refer lopital Victoria kot i ti ganny sertifye mor.

Sete ver 4.30 apremidi ki Gard Lakot Seychelles, ki ti'n ganny deplwaye zot osi pour asiste avek resers, ti trouv Shrogie dan delo.

I ti ganny transporte Anse Royale li osi kot dokter ti sertifye li mor.

Following is the URL to the original story. The site may have removed or archived this story. URL: http://www.seychelles-online.com.sc/archives/5020903.html